ང་ཚོའི་རྩ་ཆེའི་ལོ་རྒྱུས།

ཕྱི་ལོ་ ༡༩༥༩ སྔོན་ལ་སྐྱབས་རྗེ་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་མཆོག་གིས་བོད་ཀོང་པོའི་ཕྱོགས་ཀྱི་བུ་ཆུ་རུ་རིག་འཛིན་དགའ་ཚལ་གླིང་དགོན་པ་ཕྱག་བཏབ་གནང་ཞིང་། ཐོག་མའི་བླ་མ་གླིང་པ་གསར་གཏོད་མཛད། སྐྱབས་རྗེ་མཆོག་གི་ཞལ་སློབ་ཀྱི་ཁྲོད་དུ་གྲུབ་པ་ཐོབ་པའི་སྐྱེས་བུ་དམ་པ་དང་། སྔགས་པ་ཆེན་པོ། དགེ་སློང་བཅས་ཤིན་ཏུ་མང་པོ་བྱུང་། སྐབས་དེར་བདུད་འཇོམས་གཏེར་གསར་གྱི་བསྟན་པ་ལེགས་པར་རྒྱས་ཡོད།

ཕྱི་ལོ་ ༡༩༥༩ རྗེས་སུ་ང་ཚོར་རང་དབང་བརླགས་ཏེ་རྒྱ་གར་དུ་སྐྱབས་བཅོལ་ལ་ཡོང་དགོས་བྱུང་། བཙན་བྱོལ་དང་སྐྱབས་བཅོལ་བའི་དཀའ་ངལ་གྱི་དུས་སྐབས་དེར། སྐྱབས་རྗེ་མཆོག་གིས་སངས་རྒྱས་ཀྱི་བསྟན་པ་ཉམས་རྒུད་དུ་མ་འགྲོ་བའི་ཆེད་དུ་དགོན་པ་ཞིག་ཕྱག་འདེབས་རྒྱུ་ནི་གལ་ཆེན་ནང་གི་དོན་ཆེན་དང་མེད་དུ་མི་རུང་བ་ཞིག་ཏུ་གཟིགས། སྔ་འགྱུར་རྙིང་མའི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་གྱི་ཆེད་དུ། སྤྱི་ནོར་གོང་ས་སྐྱབས་མགོན་བཅུ་བཞི་པ་ཆེན་པོ་མཆོག་གིས་སྐྱབས་རྗེ་འཇིགས་བྲལ་ཡེ་ཤེས་རྡོ་རྗེ་མཆོག་ལ་སྔ་འགྱུར་རྙིང་མ་པའི་དབུ་འཛིན་བླ་ན་མེད་པར་བཞུགས་རྒྱུའི་རེ་བསྐུལ་གནང་།

གོང་ས་མཆོག་གི་ཐུགས་རེ་བཀའ་ལུང་སྙིང་ལ་བཅངས་ཏེ། སྐྱབས་རྗེ་རིན་པོ་ཆེས་དགོན་པ་ཞིག་ཕྱག་འདེབས་རྒྱུའི་ཐུགས་ཐག་བཅད་ཅིང་། བཙན་བྱོལ་བོད་གཞུང་གི་ལམ་སྟོན་དང་། ཨོ་ཌི་ཤཱ་མངའ་སྡེ་གཞུང་གིས་ས་ཆ་འདུ་འགོད་ཀྱི་རོགས་རམ་འོག བདུད་འདུལ་རབ་བརྟན་གླིང་ཕྱག་འདེབས་ས་ཨོ་ཌི་ཤཱ་འདེམས་གནང་མཛད།

ཀྱེ་རྡོ་རྗེའི་རྒྱུད་ལས་གསུངས་པའི་གནས་ཆེན་ཉེར་བཞིའི་ཡ་གྱལ་ཞིག་ཡིན་པར་བརྟེན། སྐྱབས་རྗེ་བདུད་འཇོམས་རིན་པོ་ཆེསཨོ་ཌི་ཤཱ་འདི་ཉིད་འདེམས་གནང་བ་ཡིན། ཨོ་ཌི་ཤཱ་ནི་ཨོ་རྒྱན་མཁའ་འགྲོའི་གླིང་གི་གནས་མཆོག་ཏུ་བརྩིའོ། སྐྱབས་རྗེ་རིན་པོ་ཆེས་བོད་ལྷོ་ཕྱོགས་ཀྱི་གནས་མཆོག་པདྨ་བཀོད་ཀྱི་བོད་མི་ཚོགས་པར་ཕྱག་བྲིས་བསྩལ་ཏེ། ཨོ་ཌི་ཤཱའི་ནང་སྔ་འགྱུར་རྙིང་མའི་དགོན་པ་དང་གཞིས་ཆགས་ཤིག་གསར་སྐྲུན་གནང་རྒྱུའི་འཆར་གཞི་བསྒྲགས་ཤིང་། ཁོང་ཚོ་ཚུར་ཕེབས་དགོས་པའི་བཀའ་མངགས་གནང་བར། ཁོང་ཚོའི་ཁྲོད་ནས་མང་པོ་ཞིག་ཆེད་དུ་ཕེབས་སོ།

ཕྱི་ལོ་ ༡༩༦༡ ལོར་སྐྱབས་རྗེ་རིན་པོ་ཆེས་ཨོ་ཌི་ཤཱའི་བོད་མིའི་བཙན་བྱོལ་གཞིས་གྲོང་གསུམ་པར་གསར་བཞེངས་གནང་བའི་དགོན་པ་དེར་བདུད་འདུལ་རབ་བརྟན་གླིང་ཞེས་མཚན་བསྩལ། ཐོག་མའི་དུས་སུ་དགོན་པ་དེར་དགེ་འདུན་པ་བརྒྱ་སྐོར་ལ་ཉེ་བ་ལྷན་ཅིག་ཏུ་འདུ་ཚོགས་ཐུབ་པ་བྱུང་། དེར་ཆོས་ལོངས་སྤྲུལ་གསུམ་གྱི་སྐུ་བརྙན་ (འོད་དཔག་མེད། སྤྱན་རས་གཟིགས། གུ་རུ་པདྨ་འབྱུང་གནས་) ཀྱང་གསར་བཞེངས་གནང་། གཡས་མཐར་ཁྲོས་མ་ནག་མོ་དང་གཡོན་མཐར་རྡོ་རྗེ་གྲོ་ལོད་བཅས་བཞུགས། བོད་དུ་ཡོད་པ་ནང་བཞིན་ཉམས་ལེན་པ་ཕལ་མོ་ཆེ་སྐུ་མཚམས་དང་སྒོམ་སྒྲུབ་ལ་བཞུགས།

བླ་མ་ཤེས་རབ་རྡོ་རྗེ་རིན་པོ་ཆེ་དང་བླ་མ་རྡོ་རྗེ་རྣམ་རྒྱལ་རིན་པོ་ཆེ་རྣམ་གཉིས་ཀྱི་གཟིགས་རྟོག་འོག ཕྱི་ལོ་ ༡༩༦༩ ལོར་ཐོག་བརྩེགས་གསུམ་ལྡན་གྱི་གཙུག་ལག་ཁང་གསར་བཞེངས་དབུ་བཙུགས་ཀྱང་། དཔལ་འབྱོར་གྱི་མཐུན་རྐྱེན་མ་འཛོམས་པའི་རྐྱེན་གྱིས་ལེགས་གྲུབ་བྱུང་བར་ལོ་བཅུ་ལྷག་འགོར། རྒྱུ་མཚན་དེ་རང་གི་དབང་གིས་དགོན་པ་འདི་ཉིད་སྐྱབས་རྗེ་རིན་པོ་ཆེའི་ཐུགས་བཀོད་ཇི་བཞིན་གསར་བཞེངས་གནང་ཐུབ་མེད། ཕྱི་ལོ་ ༡༩༧༩ ལོའི་ཟླ་ ༢ པའི་ཚེས་ ༣ ཉིན་སྤྱི་ནོར་གོང་ས་སྐྱབས་མགོན་ཏཱ་ལའི་བླ་མ་མཆོག་གིས་བདུད་འདུལ་རབ་བརྟན་གླིང་དགོན་པ་གསར་པ་འདི་ཉིད་རབ་གནས་དང་དབུ་འབྱེད་གནང་།

རིམ་བཞིན་སྐྱབས་རྗེ་བདུད་འཇོམས་རིན་པོ་ཆེའི་སྲས་དང་དབོན་པོ་རྣམས་ཏེ། སྐྱབས་རྗེ་གཞན་ཕན་ཟླ་བ་ནོར་བུ་དང་། སྐྱབས་རྗེ་རྫོང་གསར་མཁྱེན་བརྩེ་རིན་པོ་ཆེ། སྐྱབས་རྗེ་གར་དབང་རྡོ་རྗེ་རིན་པོ་ཆེ་བཅས་དང་། གཞན་ཡང་སྐྱབས་རྗེ་བདུད་འཇོམས་རིན་པོ་ཆེའི་ཞལ་སློབ་ཏུ་གྱུར་པའི་སྐྱེས་ཆེན་དམ་པ་མང་པོས་དགོན་པ་འདི་ཉིད་སྲུང་སྐྱོབ་དང་མི་ཉམས་རྒྱུན་འཛིན་བྱེད་པར་རོགས་རམ་གནང་།

ད་ལྟའི་ཆར་སྐྱབས་རྗེ་བདུད་འཇོམས་རིན་པོ་ཆེའི་བསླུ་མེད་ཡང་སྲིད་མཆོག་སྐྱབས་རྗེ་བདུད་འཇོམས་སངས་རྒྱས་པདྨ་བཞད་པ་རིན་པོ་ཆེ་ཞེས་མཚན་གསོལ་བ་ང་ཚོའི་འཚོ་བའི་ཁྲོད་དུ་ཕེབས་པ་བསྐལ་བ་བཟང་། ཇི་སྐད་དུ།

“འདུས་པའི་སྐུ་ནི་རྡོ་རྗེ་འཆང་ཆེན་འཇིགས་བྲལ་ཡེ་ཤེས་རྡོ་རྗེ་དང་།
མ་འོངས་པའི་སྐུ་ནི་སངས་རྒྱས་བདེ་གཤེགས་མོས་པ་མཐའ་ཡས།
ད་ལྟའི་སྐུ་ནི་བརྟུལ་ཞུགས་གྲུབ་པའི་རྣལ་འབྱོར་པ་དང་བསྟན་པའི་གཙུག་རྒྱན།
སངས་རྒྱས་པདྨ་བཞད་པར་གསོལ་བ་འདེབས།”

ཞེས་ལུང་བསྟན་པ་ལྟར། རྣམ་ཐར་གྱི་ཚིགས་བཅད་ཐུང་ངུ་འདི་དང་ལྡན་པའི་སངས་རྒྱས་པདྨ་བཞད་པ་རིན་པོ་ཆེ་མཆོག་ནི་བདུད་འདུལ་རབ་བརྟན་གླིང་གི་དབུ་འཛིན་དང་གདན་ས་འཛིན་པ་བླ་ན་མེད་པ་དེ་ཡིན།