དགོན་པའི་འགན་འཛིན་རིམ་བྱོན།

བླ་མ་བསོད་ནམས་བཀྲ་ཤིས་ལགས་ནི་ཕྱི་ལོ་ ༡༩༨༧ ལོར་སྐུ་འཁྲུངས་ཤིང་། སྐུ་ཆུང་ངུའི་དུས་ནས་བཟུང་བདུད་འཇོམས་ཆོས་བརྒྱུད་ལ་སློབ་གཉེར་གནང་། ཁོང་གིས་བལ་ཡུལ་བདུད་འཇོམས་དགོན་པ་དང་བདུད་འདུལ་རབ་བརྟན་གླིང་དགོན་པ་བཅས་སུ་བོད་ཡིག་དང་། གཞུང་ལུགས། ཆོ་ག་ཕྱག་ལེན། གར་འཆམས་སོགས་ལ་སློབ་གཉེར་དང་སྦྱོང་བརྡར་མཐར་ཕྱིན་པར་གནང་།

བདུད་འདུལ་རབ་བརྟན་གླིང་དགོན་པའི་འགན་ཁུར་བཞེས་པ་ནས་བཟུང་། ཁོང་གིས་དགོན་པ་སླར་གསོ་བྱ་རྒྱུ་དང་། དགོན་པའི་ཤེས་ཡོན་ལ་རྒྱབ་སྐྱོར། གྲྭ་པ་བསྡུ་རུབ། མཐུན་རྐྱེན་འཛུགས་སྐྲུན། བདུད་འཇོམས་གཏེར་གསར་གྱི་ཆོས་རྒྱུན་མི་ཉམས་རྒྱུན་འཛིན་བྱ་རྒྱུ་བཅས་ཀྱི་ཐད་ལ་གཙོ་བོའི་འགན་ཁུར་བཞེས། ཁོང་གིས་སྐྱབས་རྗེ་བདུད་འཇོམས་ཡང་སྲིད་རིན་པོ་ཆེ་དང་། རྫོང་གསར་མཁྱེན་བརྩེ་རིན་པོ་ཆེ། བྱ་བྲལ་རིན་པོ་ཆེ། ༧གོང་ས་སྐྱབས་མགོན་ཆེན་པོ་མཆོག་སོགས་སྐྱེས་ཆེན་དམ་པ་མང་པོའི་ཞལ་སྔ་ནས་དབང་ལུང་མན་ངག་མཐའ་ཡས་པ་གསན།

ཁོང་གིས་བདུད་འཇོམས་ཆོས་བརྒྱུད་ཀྱི་སྐོར་ལ་ཕྱག་དེབ་མང་པོ་བརྩམས་ཤིང་དཔར་སྐྲུན་གནང་བ་མ་ཟད། ཆོས་ཀྱི་བྱ་བ་དང་དབང་ལུང་ཆེན་མོ་ཁག་གོ་སྒྲིག་གནང་ཞིང་། ད་ལྟའི་ཆར་ཡང་དགོན་པའི་ཤེས་ཡོན་གྱི་བྱ་བཞག་དང་ཟངས་མདོག་དཔལ་རིའི་ལས་གཞི་མུ་མཐུད་ནས་ཐུགས་འགན་གནང་བཞིན་ཡོད།