བླ་མ་བསོད་ནམས་བཀྲ་ཤིས་རིན་པོ་ཆེ།
བླ་མ་བསོད་ནམས་བཀྲ་ཤིས་མཆོག་ནི་ཕྱི་ལོ་ ༡༩༨༧ ཟླ་ ༨ ཚེས་ ༡༡ ཉིན་ཡབ་འཆམ་དཔོན་བླ་མ་རྡོ་རྗེ་འཕྲིན་ལས་དང་། ཡུམ་ཉི་མ་གཡུ་སྒྲོན་གཉིས་ཀྱི་སྲས་སུ་སྐུ་བལྟམས། ཁོང་གི་མཚན་ནི་དབུ་མཛད་ཆེན་མོ་བདུད་རྩི་རྡོ་རྗེ་མཆོག་གིས་བསྩལ་ལ་ཁོང་གི་སྤོ་པོ་ཡིན། བདུད་རྩི་རྡོ་རྗེ་ལགས་ནི་༧སྐྱབས་རྗེ་བདུད་འཇོམས་རིན་པོ་ཆེ་མཆོག་གིས་བདུད་འཇོམས་གཏེར་གསར་གྱི་འཆམ་གྱི་དགེ་རྒན་དུ་བསྐོ་གཞག་གནང་བ་ཞིག་རེད། བླ་མ་བསོད་ནམས་བཀྲ་ཤིས་ཀྱི་ཡབ་རྡོ་རྗེ་འཕྲིན་ལས་ལགས་ཀྱིས་ཀྱང་རང་གི་ཡབ་ཀྱི་རྗེས་སུ་བཟུང་སྟེ་འཆམ་དཔོན་དང་དབུ་མཛད་ཀྱི་ཐུགས་འགན་བཞེས། རྡོ་རྗེ་འཕྲིན་ལས་དང་ཉི་མ་གཡུ་སྒྲོན་གཉིས་ལ་སྲས་དང་སྲས་མོ་དྲུག་འཁྲུངས་པ་ལས་གཅིག་ཆུང་དུས་ནས་ཚེ་ལས་འདས། བསོད་ནམས་བཀྲ་ཤིས་མཆོག་ནི་གསོན་པོར་བཞུགས་པའི་སྤུན་མཆེད་ལྔའི་ནང་གི་གསུམ་པ་དེ་རེད།
བསོད་ནམས་བཀྲ་ཤིས་མཆོག་ཕྱི་ལོ་ ༡༩༩༠ ལོར་བལ་ཡུལ་བདུད་འཇོམས་དགོན་པར་བདུད་འཇོམས་གཏེར་གསར་གྱི་བརྒྱུད་པ་སློབ་གཉེར་གནང་བར་ཕེབས། ཕྱི་ལོ་ ༡༩༩༦ ནས་དབུ་བཙུགས་ཏེ་ལོ་གསུམ་རིང་ཙནྡྲ་གི་རི་དབུས་བོད་མིའི་སློབ་གྲྭར་སློབ་སྦྱོང་གནང་། ཕྱི་ལོ་ ༡༩༩༩ ལོར་བདུད་འདུལ་རབ་བརྟན་གླིང་དགོན་པར་ཆོས་ཞུགས་གནང་སྟེ། དེར་བོད་ཀྱི་བརྡ་སྤྲོད་དང་། དག་ཡིག བློ་འཛིན་བཅས་ལ་སྦྱངས་པ་གནང་བར་མ་ཟད། རྣམ་གྲོལ་གླིང་གི་མཁན་པོའི་དྲུང་ནས་རྙིང་མའི་མདོ་ཕྱོགས་ཀྱི་གཞུང་ལུགས་ལ་གསན་བསམ་མཛད། བཙུན་པ་གཞན་རྣམས་དང་ལྷན་དུ་རང་གི་བླ་མ་དམ་པ་སྐུ་གཤེགས་ཟིན་པ་བླ་མ་པདྨ་ཆོས་དབྱིངས་མཆོག་གི་དྲུང་ནས་བདུད་འཇོམས་ཆོ་ག་ཕྱག་ལེན་གྱི་སྐོར་རྣམས་གསན། བླ་མ་པདྨ་ཆོས་དབྱིངས་སྐུ་གཤེགས་རྗེས་སློབ་དཔོན་འཇམ་དབྱངས་ལགས་ཀྱི་དྲུང་ནས་ཆོ་གའི་སློབ་གཉེར་མཐར་ཕྱིན་པར་གནང་། གཞན་ཡང་རང་གི་ཡབ་བླ་མ་རྡོ་རྗེ་འཕྲིན་ལས་ལགས་ཀྱི་དྲུང་ནས་དྭགས་པོ་སྒམ་པོ་པའི་ཆོས་སྐོར་གསན། བསོད་ནམས་བཀྲ་ཤིས་མཆོག་ཆུང་དུས་སུ་སློབ་སྦྱོང་ལ་ཐུགས་སྣང་ཆུང་ཞན་པོ་ཡོད་ནའང་། རང་གི་དགེ་རྒན་དང་རྒན་རབས་རྣམས་ལ་གུས་ཞབས་ཆེ་ཞིང་བྱིས་པ་ཆུང་ངུ་རྣམས་ལ་བྱམས་སྐྱོང་ཆེན་པོ་གནང་མཁན་ཞིག་ཡིན། དགུང་ལོ་ཆུང་ངུའི་དུས་ནས་བསྟན་པ་ལ་ཞབས་འདེགས་ཞུ་རྒྱུར་ཐུགས་ཐག་བཅད་དེ་དོ་སྣང་ཆེན་པོ་བསྐྱེད་པས། ཀུན་གྱིས་དགའ་པོ་དང་ཡིད་ཆེས་བློས་འགེལ་བྱེད་ཡུལ་དུ་གྱུར།
ཐོག་མའི་ཐུགས་འགན།
ཕྱི་ལོ་ ༢༠༠༥ ལོའི་གཡས་གཡོན་དུ་བདུད་འདུལ་རབ་བརྟན་གླིང་དགོན་པ་ཉམས་རྒུད་དུ་འགྲོ་བའི་སྐབས་སུ། བླ་མ་བསོད་ནམས་བཀྲ་ཤིས་མཆོག་གིས་སྐབས་དེའི་དགོན་པའི་གཙོ་འཛིན་སྤྲུལ་སྐུ་ཚེ་འཕེལ་རིན་པོ་ཆེའི་ཕྱག་རོགས་སུ་ཐུགས་འགན་འགའ་ཤས་བཞེས་ཏེ་རོགས་རམ་གནང་རྒྱུ་དབུ་བཙུགས། ཐོག་མའི་ཆར་བླ་མ་བསོད་ནམས་མཆོག་གིས་ཟླ་རེའི་མཆོད་འབུལ་ཁག་དང་ཆོས་ཕྱོགས་ཀྱི་ཞལ་འདོན་ཕྱག་ལེན་རྣམས་རྒྱུན་སྐྱོང་གནང་རྒྱུར་དཀའ་ངལ་གང་མང་འཕྲད། སྤྲུལ་སྐུ་ཚེ་འཕེལ་རིན་པོ་ཆེ་མཆོག་གི་བཀའ་སློབ་ལམ་སྟོན་བཞིན། བླ་མ་བསོད་ནམས་མཆོག་གིས་དགོན་པ་འདི་ཉིད་སྔར་གྱི་གཟི་བརྗིད་ལྡན་པའི་གནས་བབས་སུ་སླར་གསོ་བྱ་བའི་ཆེད་དུ་རྒྱ་གར་རྒྱལ་ཡོངས་སུ་ཞལ་འདེབས་བསྡུ་རུབ་ཀྱི་སྐོར་བསྐྱོད་གནང་། ཁོང་གིས་ཞལ་འདེབས་གསོལ་སྩལ་བྱུང་བ་རྣམས་ལ་བརྟེན་ནས་གྲྭ་པ་གསར་པ་བཅོ་ལྔ་ཙམ་བསྡུ་རུབ་ཐུབ་པ་བྱུང་ཞིང་། དགོན་པའི་གནས་སྟངས་དང་གྲྭ་པ་རྣམས་ཀྱི་འཚོ་བའི་མཐུན་རྐྱེན་ཡར་རྒྱས་བཏང་།
ཁོང་གིས་༧སྐྱབས་རྗེ་བདུད་འཇོམས་ཡང་སྲིད་པདྨ་བཞད་པ་རིན་པོ་ཆེ་མཆོག་གི་དྲུང་ནས་དགོན་པའི་ཕྱག་ལས་ཀྱི་སྐོར་ལ་ལམ་སྟོན་དང་དགོངས་འཆར་ཐེངས་གཉིས་ཞུས། བླ་མ་བསོད་ནམས་བཀྲ་ཤིས་མཆོག་གིས་གྲྭ་པ་རྣམས་ཀྱི་ཤེས་ཡོན་སློབ་གསོའི་ཆེད་དུ་བཙན་བྱོལ་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ལ་དཔལ་འབྱོར་གྱི་རོགས་རམ་ཞུས་པ་བཞིན། ད་ལྟའི་ཆར་ཁོང་ལ་ཟླ་རེར་སློབ་དཔོན་གྱི་ཕོགས་སྩལ་གནང་བཞིན་ཡོད།
ཕྱི་ལོ་ ༢༠༡༠ ལོར་༧སྤྲུལ་སྐུ་ཚེ་འཕེལ་རིན་པོ་ཆེ་མཆོག་ཞི་བར་གཤེགས་པ་དང་། དགོན་པའི་ཕྱག་ལས་ཀྱི་ཐུགས་འགན་ཡོངས་རྫོགས་བསོད་ནམས་ལགས་ཀྱི་ཕྲག་པར་བབས། སྐབས་དེར་གྲྭ་པའི་ཞལ་ལག་དང་ཉེར་མཁོའི་འགྲོ་གྲོན་གྱི་རྨང་གཞིའི་དཔལ་འབྱོར་གང་ཡང་མེད་པས། ཁོང་ལ་དཔལ་འབྱོར་འཛིན་སྐྱོང་དང་འཆར་གཞི་སྒྲིག་རྒྱུའི་ཐོག་དཀའ་ངལ་ཆེན་པོ་འཕྲད། དུས་སྐབས་དེར། ཁོང་གིས་རྒྱབ་སྐྱོར་དང་རོགས་རམ་ཞུ་ཆེད་༧སྐྱབས་རྗེ་དགའ་རབ་རིན་པོ་ཆེ་མཆོག་དང་། ༧སྐྱབས་རྗེ་རྫོང་གསར་མཁྱེན་བརྩེ་རིན་པོ་ཆེ་མཆོག སྐུ་གཤེགས་ཟིན་པ་༧སྐྱབས་རྗེ་གཤེན་ཕན་ཟླ་བ་རིན་པོ་ཆེ་མཆོག་བཅས་བླ་ཆེན་ཁག་ལ་འབྲེལ་བ་ཞུས། རིན་པོ་ཆེ་རྣམ་པ་གསུམ་ཀས་རོགས་རམ་གནང་རྒྱུའི་ཞལ་བཞེས་བཟང་པོ་ཐོབ་པ་ནས་བཟུང་། དགོན་པའི་དཔལ་འབྱོར་གྱི་གནས་བབས་བརྟན་ལྷིང་དུ་ཕྱིན།
ཕྱི་ལོ་ ༢༠༡༦ ལོར། བླ་མ་བསོད་ནམས་བཀྲ་ཤིས་མཆོག་གིས་གདུང་སྲས་དགའ་རབ་རྡོ་རྗེ་རིན་པོ་ཆེ་མཆོག་གི་རྒྱ་ཆེའི་སྦྱིན་བདག་འོག་གྲྭ་ཤག་གསར་པ་དང་སློབ་ཁང་གསར་རྒྱག་ཐུབ་པ་བྱུང་། གཞན་ཡང་བླ་མ་མང་པོ་ཞིག་གི་སྐུ་མདུན་ནས་སྦྱིན་བདག་གུ་རུ་མཚན་བརྒྱད་ཀྱི་འཆམ་ཞལ་དང་། གཞན་ཡང་ཁྱོན་བསྡོམས་འཆམ་ཞལ་བདུན་ཅུ་ལྷག་དང་། དེ་བཞིན་འཆམ་གོས་བཅས་ཀྱི་མཐུན་རྐྱེན་སྦྱར་གནང་མཛད། བཞུགས་ཁྲི་གསར་པ་བཞེངས་པ་དང་། ཆོ་ག་ཕྱག་ལེན་གྱི་ཡོ་བྱད་དང་མཆོད་རྫས་མང་པོ་གསར་ཉོ་ཐུབ་པ་བྱུང་། འདི་དག་ཕུད་པའི་ལས་གཞི་ཆུང་བ་མང་པོ་ཞིག་ཀྱང་ལམ་ལྷོངས་ཀྱིས་གྲུབ་པར་མཛད།
བླ་མ་བསོད་ནམས་བཀྲ་ཤིས་མཆོག་གིས་མུ་མཐུད་ནས་བདུད་འདུལ་རབ་བརྟན་གླིང་གི་དགེ་འདུན་པ་རྣམས་ལ་ནང་ཆོས་ཀྱི་གཞུང་ལུགས་དང་ཆོ་ག་ཕྱག་ལེན་ཁག་སློབ་ཁྲིད་གནང་བཞིན་ཡོད། ཁོང་གིས་རང་གི་བླ་མ་དང་དགེ་བའི་བཤེས་གཉེན་རྣམས་ཀྱི་བྱིན་རླབས་དང་། ཆོས་གྲོགས་རྣམས་ཀྱི་ཐུགས་སྨོན་བཀའ་དྲིན་ལ་བརྟེན་ནས། དགོན་པའི་འགན་ཁུར་རྣམས་བར་ཆད་དང་གེགས་མེད་པར་བྱུང་བར་ཡིད་ཆེས་གནང་གི་ཡོད། ༧སྐྱབས་རྗེ་བདུད་འཇོམས་ཡང་སྲིད་རིན་པོ་ཆེ་མཆོག་གི་བྱིན་རླབས་དང་བཀའ་འཁྲོལ་འོག བླ་མ་བསོད་ནམས་མཆོག་ཕྱི་ལོ་ ༢༠༡༩ ལོ་ནས་བཟུང་ཕྱི་རྒྱལ་ཁག་ལ་ཆིབས་བསྒྱུར་བསྐྱངས་ཤིང་། དེས་བདུད་འདུལ་རབ་བརྟན་གླིང་གི་དཔེ་མཛོད་ཁང་གསར་རྒྱག་དང་། ད་ལྟ་འགྲོ་བཞིན་པའི་ཟངས་མདོག་དཔལ་རིའི་རྟེན་བཞེངས་ལས་གཞི་གཉིས་ཀྱི་ཆེད་དུ་དགོས་ངེས་ཀྱི་དཔལ་འབྱོར་མཐུན་རྐྱེན་བསྡུ་རུབ་བྱེད་པར་ཕན་ཐོགས་ཆེན་པོ་བྱུང་ཡོད།
དབང་ལུང་རྗེས་གནང་།
བླ་མ་བསོད་ནམས་བཀྲ་ཤིས་མཆོག་གིས་བདུད་འཇོམས་གཏེར་གསར་གྱི་དབང་སྟོད་ཆ་རྣམས་སྐྱབས་རྗེ་གཏེར་ཆེན་ནམ་མཁའ་དྲི་མེད་རབ་འབྱམས་རིན་པོ་ཆེའི་དྲུང་ནས་གསན། ད་ལྟའི་ཆར་ཁོང་གིས་དབང་དེ་དག་བདུད་འདུལ་རབ་བརྟན་གླིང་དུ་གྲ་སྒྲིག་དང་གོ་སྒྲིག་ལམ་ལྷོངས་ལྡན་པར་གནང་ཡོད། དབང་སྨད་ཆ་རྣམས་དང་བདུད་འཇོམས་གཏེར་མཛོད་བརྒྱུད་པའི་ལུང་ཡོངས་རྫོགས་སྐུ་གཤེགས་ཟིན་པ་སྐྱབས་རྗེ་སྤྲུལ་སྐུ་ཚེ་འཕེལ་རིན་པོ་ཆེའི་དྲུང་ནས་གསན་པར་མ་ཟད། སྤྲུལ་སྐུ་ཚེ་འཕེལ་མཆོག་གི་དྲུང་ནས་གསང་བའི་མན་ངག་དང་གདམས་ངག་ཀྱང་གསན། སྐྱབས་རྗེ་འཇམ་མགོན་ཀོང་སྤྲུལ་གྱི་སྨྱུང་གནས་ཆོ་གའི་ལུང་སྐྱབས་རྗེ་བྱ་བྲལ་རིན་པོ་ཆེའི་དྲུང་ནས་གསན། སྐྱབས་རྗེ་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱི་གསུང་འབུམ་ཡོངས་རྫོགས་ཀྱི་ལུང་སྐྱབས་རྗེ་རྫོང་གསར་འཇམ་དབྱངས་མཁྱེན་བརྩེ་རིན་པོ་ཆེའི་དྲུང་ནས་གསན། སྐྱབས་རྗེ་པདྨ་བཀོད་རྒྱལ་སྲས་རིན་པོ་ཆེའི་དྲུང་ནས་ཁྲོས་མའི་ཆོས་སྐོར་དང་། བདུད་འཇོམས་རིན་པོ་ཆེའི་གདམས་ངག་དང་འཕོ་བའི་སྔོན་འགྲོའི་ཁྲིད་བཅས་གསན། སྐྱབས་རྗེ་བདེ་གཤེགས་རིན་པོ་ཆེའི་གསུང་འབུམ་གྱི་ལུང་ཡོངས་རྫོགས་སྐྱབས་རྗེ་སྤྲུལ་སྐུ་དགྱེས་པ་རྡོ་རྗེ་རིན་པོ་ཆེའི་དྲུང་ནས་གསན། སྟག་ཤམ་གཏེར་ཆོས་ཀྱི་དབང་སྐྱབས་རྗེ་གཏེར་ཆེན་ནམ་མཁའ་དྲི་མེད་རབ་འབྱམས་རིན་པོ་ཆེའི་དྲུང་ནས་གསན། རིན་ཆེན་གཏེར་མཛོད་ཡོངས་རྫོགས་ཀྱི་དབང་སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེའི་དྲུང་ནས་གསན། རིན་ཆེན་གཏེར་མཛོད་ཀྱི་ལུང་ཡོངས་རྫོགས་སྐྱབས་རྗེ་ཞེ་ཆེན་རབ་འབྱམས་རིན་པོ་ཆེའི་དྲུང་ནས་གསན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་དྲུང་ནས་དུས་འཁོར་དབང་ཆེན་གསན། སྐྱབས་རྗེ་གདུང་སྲས་དགའ་རབ་རིན་པོ་ཆེའི་དྲུང་ནས་ཁྲོས་མ་ནག་མོའི་དབང་ཆེན་གསན། གཞན་ཡང་རང་གི་ཡབ་འཆམ་དཔོན་བླ་མ་རྡོ་རྗེ་འཕྲིན་ལས་ལགས་ཀྱི་དྲུང་ནས་བདུད་འཇོམས་ཆོས་བརྒྱུད་ཀྱི་གར་འཆམ་རྣམས་སྦྱངས། རྒྱ་གར་དྷ་རམ་ས་ལར་རྟེན་གཞི་བྱས་པའི་བོད་ཀྱི་ཟློས་གར་སློབ་གཉེར་ཁང་གི་དགེ་རྒན་རྣམས་ཀྱི་དྲུང་ནས་གླིང་བྲོ་ (གླིང་རྗེ་གེ་སར་གྱི་གར་འཆམ་) དང་གྲུབ་ཐོབ་ཐང་སྟོང་རྒྱལ་པོའི་ལྷ་མོའི་ཟློས་གར་བཅས་གསན། སྐྱབས་རྗེ་པདྨ་བཀོད་རྒྱལ་སྲས་རིན་པོ་ཆེའི་དྲུང་ནས་འཇའ་ཚོན་སྙིང་པོའི་དབང་ལུང་གསན། ༧སྐྱབས་རྗེ་བདུད་འཇོམས་ཡང་སྲིད་རིན་པོ་ཆེའི་དྲུང་ནས་ཁྲོས་མའི་དབང་དང་། རྡོ་རྗེ་གྲོ་ལོད་ཀྱི་དབང་། སྒྲོལ་མའི་དབང་བཅས་གསན་ནོ།
ཁོང་གི་མཛད་རྗེས་འཕར་མས྄
བླ་མ་བསོད་ནམས་བཀྲ་ཤིས་མཆོག་གིས་བདུད་འཇོམས་དཀྱིལ་འཁོར་ཕྱོགས་བསྡུས་ཆེན་མོ་པར་སྐྲུན་གནང་བ་དེས་འཛམ་གླིང་ཡོངས་ཀྱི་གཏེར་གསར་བརྒྱུད་པ་འཛིན་པ་རྣམས་ལ་ཕན་ཐོགས་ཆེན་པོ་བྱུང་ཡོད། ཁོང་གིས་བོད་ཡིག་དབུ་ཅན་དབུ་མེད་ཀྱི་མ་ཕྱི་འགྲོ་ཕན་ཡིག་གཟུགས་དེབ་དང་། བདུད་འཇོམས་གསོལ་ཁ། རིས་མེད་ཞལ་འདོན་གཅེས་བཏུས་བཅས་ཀྱི་ཕྱག་དེབ་ཀྱང་མང་པོ་རྩོམ་སྒྲིག་གནང་། གཞན་ཡང་ཁོང་གིས་བདུད་འཇོམས་གཏེར་གསར་གྱི་གར་འཆམ་སྐོར་གྱི་འོད་སྡེར་ཞིག་ཀྱང་བཟོ་སྐྲུན་གནང་བ་དེར་༧སྐྱབས་རྗེ་བདུད་འཇོམས་རིན་པོ་ཆེ་མཆོག་དང་གདུང་སྲས་དགའ་རབ་རིན་པོ་ཆེ་མཆོག་རྣམ་གཉིས་ཀྱིས་བསྔགས་བརྗོད་དང་རྒྱབ་སྐྱོར་གནང་ཡོད། བླ་མ་བསོད་ནམས་མཆོག་གིས་བདུད་འདུལ་རབ་བརྟན་གླིང་དུ་དཀོན་ཞིང་བྱིན་རླབས་ཆེ་བའི་ཕུར་པའི་སྨན་སྒྲུབ་སྒྲུབ་ཆེན་ཐེངས་གསུམ་གོ་སྒྲིག་གནང་ཞིང་། དེ་དག་རེ་རེ་བཞིན་དགོན་པའི་བླ་ཆེན་ཁག་གིས་དབུ་ཁྲིད་གནང་ཡོད། ད་ལྟའི་ཆར་ཁོང་གིས་ཨོ་ཌི་ཤར་གསར་དུ་བཙུགས་པའི་ཁྲོས་མ་ཚོགས་པ་སྟེ་ཁྱིམ་པ་ཉམས་ལེན་པའི་ཚོགས་པ་དེར་གཟིགས་རྟོག་གནང་བཞིན་ཡོད་པ་དང་། ཟླ་རེའི་གཅོད་ཀྱི་འདུ་འཛོམས་སྐབས་སུ་ཁོང་ཚོར་སློབ་ཁྲིད་དང་དབུ་ཁྲིད་གནང་བཞིན་ཡོད།
བླ་མ་བསོད་ནམས་བཀྲ་ཤིས་མཆོག་གི་མཛད་རྗེས་ངོ་མཚར།
ཕྱི་ལོ་ ༢༠༡༦ ལོའི་ཟླ་བ་གཉིས་པ་དང་གསུམ་པའི་ནང་། བླ་མ་བསོད་ནམས་བཀྲ་ཤིས་མཆོག་གིས་གདུང་སྲས་རྣམ་གཉིས་ཏེ། སྐྱབས་རྗེ་དགའ་རབ་རྡོ་རྗེ་རིན་པོ་ཆེ་མཆོག་དང་སྐྱབས་རྗེ་ཀ་ཐོག་སི་ཏུ་རིན་པོ་ཆེ་མཆོག་རྣམ་གཉིས་གདན་ཞུས་ཀྱིས་སྣེ་ལེན་ཞུས་ཐུབ་པ་བྱུང་། གདན་ཞུའི་རིང་ལ། རིན་པོ་ཆེ་རྣམ་པ་གཉིས་ཀས་དབང་ལུང་མང་པོ་བསྩལ་བར་མ་ཟད། དགེ་འདུན་ནི་སྡེ་དང་སེར་སྐྱ་མི་མངས་ཡོངས་ལ་ཐུགས་བརྩེ་བ་ཆེན་པོས་ཆོས་ཀྱི་བཀའ་སློབ་ལམ་སྟོན་ཟབ་མོ་གནང་། མཛད་སྒོའི་ལས་རིམ་འདི་དག་ཐམས་ཅད་བར་ཆད་དང་གེགས་གང་ཡང་མེད་པར་ལམ་ལྷོངས་ཀྱིས་གྲུབ། དེར་བཅར་བའི་མི་མངས་ཡོངས་ལ་བྱིན་རླབས་ངོ་མཚར་རྨད་དུ་བྱུང་བ་དང་ཚང་མའི་ཐུགས་བློ་ཚིམ་ཡོད། དུས་སྐབས་དེར། བླ་མ་བསོད་ནམས་མཆོག་གིས་རང་གི་ལས་སྐལ་གྱི་བླ་མ་དང་རྩ་བའི་བླ་མ་སྟེ། སྐྱབས་རྗེ་སྤྲུལ་སྐུ་ཚེ་འཕེལ་རིན་པོ་ཆེ་མཆོག་གི་ཡང་སྲིད་རིན་པོ་ཆེའི་ཁྲི་འདོན་མཛད་སྒོ་གཟབ་རྒྱས་ཤིག་ཀྱང་གོ་སྒྲིག་གནང་། ཁྲི་འདོན་གྱི་མཛད་སྒོ་དེ་ཉིད་སྐྱབས་རྗེ་ཀ་ཐོག་སི་ཏུ་རིན་པོ་ཆེ་མཆོག་གིས་དབུ་ཁྲིད་དེ་བསྐྱངས་ཤིང་། དེ་ནི་སྐུ་གཤེགས་ཟིན་པ་བདུད་འཇོམས་གསང་ཡུམ་མཁའ་འགྲོ་རིག་འཛིན་དབང་མོ་རིན་པོ་ཆེ་མཆོག་དང་། སྐུ་གཤེགས་ཟིན་པ་སྐྱབས་རྗེ་གཞན་ཕན་ཟླ་བ་རིན་པོ་ཆེ་མཆོག་རྣམ་གཉིས་ཀྱིས་ཡང་སྲིད་རིན་པོ་ཆེ་ཉིད་མ་ནོར་བར་ངོས་འཛིན་དང་གཏན་འབེབས་པ་སོགས་གནང་།
ཕྱི་ལོ་ ༢༠༡༧ ལོར། བལ་ཡུལ་དུ་༧སྐྱབས་རྗེ་བདུད་འཇོམས་ཡང་སྲིད་རིན་པོ་ཆེ་མཆོག་གིས་དབུ་ཁྲིད་པའི་འཛམ་གླིང་ཞི་བདེའི་ཆེད་ཀྱི་ཁྲོས་མ་འབུམ་ཚོགས་ཐེངས་གཉིས་པའི་སྐབས་སུ། བླ་མ་བསོད་ནམས་བཀྲ་ཤིས་མཆོག་གིས་དབུ་མཛད་ཀྱི་ཐུགས་འགན་བཞེས། དུས་སྐབས་དེར། བླ་མ་བསོད་ནམས་བཀྲ་ཤིས་མཆོག་གིས་ཀཐ་མན་གྲུའི་ཤར་པའི་དགོན་པར་ཉིན་གྲངས་དུ་མའི་རིང་འབུམ་ཚོགས་ཀྱི་དབུ་མཛད་གནང་ཞིང་། ཁོང་གིས་རིན་པོ་ཆེ་དང་། བླ་མ། གྲྭ་པ། བཙུན་མ། དེ་བཞིན་དད་ལྡན་མི་མངས་བཅས་སྟོང་ཕྲག་མང་པོའི་མདུན་དུ་དབུ་མཛད་གནང་། བླ་མ་མཆོག་གིས་རྒྱ་གར་ལྷོ་ཕྱོགས་བོད་མའི་གཞིས་ཆགས་ལྦེ་ལ་ཀོ་པི་ལ་་ཁྲོས་མ་ཉམས་ལེན་པ་བརྒྱ་ལྷག་དང་། རྒྱ་གར་བྱང་ཕྱོགས་ཨུཏྟརཱཁཎྜ་དུ་ཁྲོས་མ་ཉམས་ལེན་པ་བརྒྱ་ལྷག དེ་བཞིན་ཨོ་ཌི་ཤར་ཁྲོས་མ་ཉམས་ལེན་པ་ལྔ་བཅུ་ལྷག་བཅས་ལ་སློབ་ཁྲིད་གནང་། བླ་མ་བསོད་ནམས་བཀྲ་ཤིས་མཆོག་གིས་མི་མང་པོ་ཞིག་ཁྲོས་མའི་ཉམས་ལེན་ནང་ཞུགས་བཞིན་པར་ཐུགས་ཧ་ཅང་དགྱེས་པོ་གནང་གི་ཡོད། ཕྱི་ལོ་ ༢༠༢༠ ལོར། བླ་མ་བསོད་ནམས་བཀྲ་ཤིས་མཆོག་གིས་ཨོ་ཌི་ཤར་སྐྱབས་རྗེ་པདྨ་བཀོད་རྒྱལ་སྲས་རིན་པོ་ཆེ་མཆོག་དང་སྐྱབས་རྗེ་དྭགས་པོ་རིན་པོ་ཆེ་མཆོག་རྣམ་གཉིས་ཀྱིས་དབུ་ཁྲིད་པའི་འཇའ་ཚོན་སྙིང་པོའི་དབང་ལུང་གོ་སྒྲིག་གནང་བར། དེར་མི་གྲངས་སྟོང་ཕྲག་མང་པོ་མཉམ་ཞུགས་བྱུང་ཡོད།
སིང་གྷ་པོར་ཡོད་པའི་ཁོང་གི་སློབ་མ་རྣམས་ཀྱི་རྒྱ་ཆེའི་རོགས་རམ་ལ་བརྟེན་ནས། བླ་མ་བསོད་ནམས་མཆོག་གིས་སློབ་ཁྲིད་ཁང་གསར་པ་དང་། གྲྭ་ཤག་ཁ་སྣོན། གློག་ཀླད་ཁང་པ། དཔེ་མཛོད་ཁང་། ཡིག་ཚང་། དེ་བཞིན་རིང་ཚད་ལ་ཧྥི་ཊི་ ༡༧༠ ཡོད་པའི་གསུང་ཆོས་ར་བ་ཆེན་མོ་བཅས་ལེགས་གྲུབ་གནང་ཐུབ་པ་བྱུང་། འདི་དག་ཐམས་ཅད་ཕྱི་ལོ་ ༢༠༢༠ ལོའི་ལོ་སྟོད་དུ་ལེགས་པར་གྲུབ། ཏོག་དབྱིབས་ནད་ཡམས་ཀྱི་སྐབས་སུ། བླ་མ་བསོད་ནམས་བཀྲ་ཤིས་མཆོག་གིས་རྒྱ་གར་བ་དང་བོད་མིའི་ཁྱིམ་ཚང་ ༡,༠༠༠ ཙམ་ལ་འཚོ་བའི་རྨང་གཞིའི་ཟས་རིགས་མཁོ་སྤྲོད་གནང་། ཁོང་གིས་ས་གནས་དེའི་སྨན་པ་དང་སྨན་ཞབས་པ་ཡོངས་ལ་ནད་ཡམས་སྔོན་འགོག་གི་གྱོན་གོས་དང་། བོད་མིའི་གཞིས་ཆགས་ཀྱི་མི་མངས་ཆེད་དུ་ཁ་རས་ ༣,༠༠༠ མཁོ་སྤྲོད་གནང་ཐུབ་པ་བྱུང་ཡོད།